Бү дьоро күн Н.Н. Туласынов аатынан норуот айымньытын киинэгир Алесандр Федорович Тегюрюков –Өлөксөөн бастакы хоһооннорун хомуурунньугун “Истиҥ иэйии илдьитэ” кинигэтин биһирэбилигэр муһуннубут.
Кинигэ аата этэрин курдук истиҥ иэйииттэн суруллубут. Хомуурунньук киһини тардар умсугутар күүһэ киһи тылыгар баар. Өлөксөөн хоһоонноро биир дойдулаахтарыгар үрдүк сыанабылы ылар. Төрөөбүт тыл кэрэтин, этэр кыаҕа киэҥин, дириҥин тиэрдэр туһуттан уус-уран айымньыга суруйааччы туттубут бэргэн этиилэрэ, тэҥнээн хоһуйуулара ордук табыгастаахтык туттуллубуттар.
Кинигэ ис тутула араас балаһаларга арахсыбыт. Холобур “Ырыа дууһа алыба” диэн балаһатыгар барыта ырыа,үҥкүү, хомус туһунан хоһоонноро киирбиттэр. Ханнык баҕарар бэйиэт айылҕа кэрэ көстүүтүн, дьыл кэмэ уларыйыытын көрдө даҕаны хоһооҥҥо тылларын тиһэн, ураты тэҥнэбиллэри туруоран хоһуйуон баҕарар. Хомуурунньукка биһиги төрөөбүт түөлбэбит, сахабыт сирин кэрэ айылҕатын туһунан олус элбэх кэрэ тыллардаах хоһоонноро “Аар айылҕа кэрэ көстүүлэрэ” диэн анал балаһаҕа киирбиттэрэ кэрэхсэбиллээх. Саха эр киһитэ былыр-былыргыттан бултаан дьонун аһатар, айылҕалыын алтыһан уоскулаҥ ылар. “Булт эмиэ үлэ” балаһатыгар бултка аналлаах хоһоонноро ааҕааччыларын тардар. Ону таһынан аймах билэ дьонугар туспа балаһаҕа бэлиэтээбитэ кэрэхсэбиллээх. Маннык хоһооннорун наардаан, тус туспа арааран хомуурунньугун таҥан оҥорбута олус кэрэхсэбиллээх. Бар дьоно, кэнчээри ыччаттар кинигэни илиилэригэр туттулар даҕаны бэйэлэригэр сөптөөх тиэмэни таланнар үөрэтиэхтэрин, дорҕоонноохтук доргуччу ааҕыахтарын сөп.
Александр Федорович айар дьоҕурун 2014 сыллаахтан “Байанай” сурунаалга, “Томпо илдьитэ” хаһыакка, куйаар ситимигэр бэчээттээн саҕалаабыта. Кини эдэр эрдэҕиттэн тыл баайдаах, уус –ураннык суруйар талааннаах буолара бэлиэтэнэр этэ. Оскуолаҕа үөрэнэр аймах оҕолоругар олоҥхо суруйан биэрэрэ, аймах билэ дьонун, табаарыстарын бэтиэхэлээх хоһооннорунан үөрдэр. Куйаар ситимигэр тахсыбыт хоһоонноро орун оннугар сөп түбэһиннэрэн сурулланнар биир дойдулаахтырын хайҕалларын куруутун ыла турар, өрөспүүбүлүкэ араас муннуктарыгар тиийэ көтөр.
Тэрээһин үөрүүлээх чааһын тыа сирэ “Байаҕантай” нэһилиэгэ баһылыга Лена Дмитриевна тыл этэн саҕалаата. Оройуоммут аҕа баһылыгын Степанов Я.И. аатыттан “Бочуоттаах грамота” уонна кыһыл көмүс чаһыны үөрүүлээхтик туттарда. Лена Дмитриевна “За вклад в развитии культуры Баягантайского наслега” бэлиэни бэйиэт түөһүгэр кэтэттэ. Норуот айымньытын киинин дириэктэрэ А.С. Баланова СӨ духуобунаска уонна культураҕа миниистирэ А.И. Ноев илии баттааһынаах “Ветеран художественной самодеятельности РС(Я)” бэлиэни туттарда. Элбэх итии истиҥ эҕэрдэ тыллар эттилэр. Биэчэри ҥ кылаас үөрэнээччилэрэ, сал. Сивцева М.В. “Эллээйик” оҕо норуодунай кэлэктиибиэ “Дьурулуйар Ньургун Боотур” олоҥхоттон быһа тардыыны бэрт сэргэхтик толордулар. Бугуева Таня ааптар “Хомус” диэн хоһоонугар хомуһунан оонньоон дьуруһуттэ. “Айгы” ветераннар кулууптара бэйэлэрин сэмэй бэлэхтэрин уонна “Иэйии” диэн ырыаны бэлэхтээтилэр. Айар суруйар талааннаах “Даадар” түмсүү аатыттан А.А.Гоголев – Гринпис эҕэрдэлээтэ уонна түмсүү аатыттан сэмэй бэлэх туттарда. Бииргэ үөрэммит үөлэннээхтэрин аатыттан А.С. Колесова эҕэрдэлээтэ. Аймахтар ааттарыттан оҕо саастан истиҥник ахтан санаан ааста бэйиэт бииргэ төрөөбүт балтыта Л.Ф. Тегюрюкова. Хас кэлбит көрөөччү эҕэрдэ тыллаах, илии тутуурдаах кэлэннэр суруйааччыбыт үөрүүтүн тэҥҥэ үллэстиннилэр.
Өлөксөөн аныгыс сырыыга аны кэпсээннэрбин кинигэ оҥоруом диэн бар дьонун үөртэ. Бу кинигэ тахсарыгар олоҕун аргыһа Любовь Ананьевна оҕолорунаан таҥан, сааһылаан оҥорбуттарын биллэрдэ. Кинигэ үйэлээх буоллун диэн дьиэ кэргэнин хаартыскалара, о5олорун ахтаалара киирбиттэр.
