Сэтинньи ый 8 күнүгэр суруйааччы-документалист, публицист, үлэ, тыыл бэтэрээнэ, СССР бэчээтин туйгуна, П.А.Ойуунускай аатынан бириэмийэ лауреата, Саха Өрөспүүбүлүкэтин култууратын үтүөлээх үлэһитэ,Таатта уонна Томпо улууһун бочуоттаах олохтооҕо Дмитрий Васильевич Кустуров 95 сааһын үбүлүөйдээх киэһэтэ буолан ааста.
Кимтэн кииннээҕин, хантан хааннааҕын туһунан Томпо оройуонун бочуоттаах олохтооҕо, РФ Суруналыыстарын Союһун чилиэнэ Николай Уйгуров бэрт интэриэһинэй иһитиннэриини оҥордо.
Дмитрий Васильевич “Репрессия ыар тыына” кинигэтин, ону тэҥэ репрессияҕа түбэспит биллиилээх дьон туһунан библиотекарь Ирина Колодезникова бэркэ билиһиннэрдэ.
Дмитрий Васильевич этэринэн П. А. Ойуунускай улуу суруйааччы, Саха норуотун чулуу уола буоларын В. А. Штыров аатынан киэҥ хайысхалаах гимназия историяҕа учуутала Николай Саввин бэрт итэҕэтиилээхтик кэпсээтэ.
Албан аатырбыт снайпер, Советскай Союз Геройа Ф. М. Охлопков аатын-суолун үйэтиппит, сүҥкэн үтүөлээх киһинэн биир дойдулааҕа Дмитрий Васильевич буоларын Геройга анаммыт кинигэлэрэ туоһу буолаллар. Эллэй “Ф. М. Охлопковка” хоһоонун Томпо оройуонун Эдэр аармыйа ыстаабын бэрэсэдээтэлэ Айал Винокуров ис дууһатыттан аахта.
Тоҕус туомнаах Аҕа дойду Улуу сэриитин кыттыылаахтарын үйэтитиигэ, “Память” кинигэ күн сирин көрүүтүгэр Дмитрий Васильевич редколлегия чилиэнин быһыытынан улахан өҥөлөөх. Хас биирдии туомунан ырытыыны библиотекарь Жанна Шунгуева оҥордо.
Саха сирин бастакы Президенин М. Е. Николаев туһунан Дмитрий Кустуров суруйарга быһаарыммытын, салайааччы үтүөтэ-өҥөтө норуокка төһө сыаналанарын электроннай өҥөнү оҥорор отдел библиотекара Римма Захарова сырдатта.
Литературнай тэрээһини ыытыыга кыттыспыт ааҕааччыларбытыгар уонна тэрээһини ыыппыт Владимир Васильевка библиотека аатыттан улахан махталбытын тиэрдэбин.
Ытык-мааны биир дойдулаахпытыгар Дмитрий Васильевичка ис сүрэхтэн тахсар эҕэрдэ тылларын аныыбыт. Кини суруйбут чулуу айымньылара, сытыы ыстатыйалара ааҕааччылары куруук үөрдэ-көтүтэ турдуннар!
Александра Ефимова, библиотекарь