Кулун тутар 27 күнүгэр Киин бибилэтиэкэҕэ Саха сирин үтүөлээх суруналыыһын, «Көмүөл» кинигэ кыһатын салайааччытын, биир дойдулаахпыт Борис Павловы – Кэми кытта истиҥ көрсүһүү буолла.
Бэйиэт, суруналыыс, кэпсээнньит – суруйааччы бэйэтин айар үлэтин, инники былааннарын туһунан биир дойдулаахтарын кытта үллэһиннэ, саҥа тахсыбыт «Кэм» сурунаалы билиһиннэрдэ. Кэлбит ыалдьыттарга, өрүү буоларын курдук, кинигэ кэһиилээх.
Борис Иванович Суруйааччылар Интернациональнай сойуустарын чилиэнэ. Бу сойуус «Диалог» сиэрийэнэн, биллиилээх суруйааччы Василий Белов аатынан бириэмийэ чэрчитинэн «Не предать время своё» кинигэтэ нууччалыы тылбаастанан тахсан ааҕааччыларын араҥата кэҥээн иһэр.
Биһиги ыалдьыппыт туһунан куйаар ситимигэр элбэҕи булан ааҕыахха сөп. Ол эрээри сирэй көрсөн, атах тэпсэн олорон кэпсэтии киһи сүрэҕэр быдан истиҥ, сылаас сыһыаны хаалларар.
4 кылаас үөрэнээччилэрэ (салайааччы М. Е. Чекурова) ааптар «Күн таҕыста» хоһоонун ааҕан иһитиннэрбиттэрэ мустубут ыалдьыттары сэргэхситтэ. Суруйааччыны илэ көрбүттэрэ, кэпсиирин истибиттэрэ, кинигэтигэр автограф суруттаран бэлэх ылбыттара – оҕолор олохторугар биир өйдүү-саныы сылдьар түгэннэрэ буолуо диэн эрэнэбит.
Борис Иванович үлэтин саҕалаабыт оройуон хаһыатын редакцията кырдьаҕас да, билиҥҥи да үлэһиттэрэ кэлэн үөрэ-көтө кэпсэтэн, ахтыыларын үллэстэн бардылар.
Кини эрдэ бэчээккэ тахсыбыт кинигэлэрин биһиги Электроннай библиотекабытыгар Library.tompolibs.ru. киирэн ааҕыаххытын сөп. Борис Иванович элбэх араас дьылҕалаах дьону көрсүбүт, философскай дириҥ ис хоһоонноох суруйуулардаах, аны саҥа хайысхатын – сценарист быһыытынан үлэтин билсиэхпит.
Тэрээһин кыттыылаахтара Борис Иванович айар үлэтигэр өссө да ситиһиини, санаабыт дьыалатын тиһэҕэр тиэрдэн, олоххо киллэрэригэр баҕардылар.
Ыҥырыылаах ыалдьыттар, сахалыы кинигэни ааҕааччылар аныгыс көрсүһүүгэ кэрэ кэпсээннээх, үтүө түмүктэрдээх буолуо диэн эрэллээх тарҕастылар.
Тэҥ ааттаах дьонтон, үгүс суруйааччылартан чопчу булан ыларга псевдоним оруоллаах. Борис Павлов – Кэм. Кэм – олоххо ааспыт, дьылҕаҕын салайбыт, билигин олорор, туоһу буолар, инникигин ыраланар, эрэли саҕар – Кэм.
Кэмҥин түһэн биэримэ!
Олорбут олоххун,
Эстибэт эрэлгин,
Киһибин дэтэргин!