Күндэ Саха сиригэр бэчээт, сурук – бичик сайдыытыгар уһулуччу улахан үтүөлээх. Кини Дьокуускай куоракка суруйааччылар айымньыларын бэчээттээн таһаарар сахалыы сурунаал, хаһыат тахсарын туруорсубута. Күндэ бэчээт дьыалатыгар сыһыаннааҕын, дьоҕурдааҕын учуоттааннар, 1924 сыллаахха Москваҕа ССРС норуоттарын Киин издательствотын иһинэн тэриллибит саха секциятыгар эппиэттиир редакторынан ыыппыттара. Баара суоҕа үс сылы кыайбат кэм иһигэр бу секция 60 кинигэни бэчээттээбитэ.
Алексей Андреевич Семен Андреевич Новгородов саха суругун –бичигин үөскэтэргэ турууласпытын өйдөөн, күүс –көмө буолан, салгыы сайыннаран 1924 – 1927 сылларга уон икки оскуолаҕа оҕолорун уонна улахан дьону үөрэтэр, биэс оскуолаҕа киирэ илик кыра оҕолору үөрэтэр кинигэлэри бэчээттээн таһаарбыта. Олор истэригэр “Улахан дьон ааҕар кинигэлэрэ”, “ Саҥа олох” диэн улахан киһини үөрэтэр букубаардарыгар кыттыһан ааптар буолбута.
Күндэ 130 сылыгар аналлаах Ийэ тыл, сурук-бичик күннэрин чэрчитинэн «Күндэ аата сахаҕа мэлдьи күндү» диэн ааттаах «Дьиктилээх хонуу» оонньуу ыытылынна. Бу оонньууга барыта 9 аа5ааччы кыттыыны ылла. Оонньууга кыттааччылар А. А. Иванов — Күндэ айымньыларын таайдылар. Түмүккэ муҥутуур кыайыылааҕынан Июля Павлова таҕыста. Суруйааччы айымньыларын сырдатар маннык оонньуулар элбэх билиини биэрэллэр.
Татьяна Гоголева
