Ийэ баар буолан —
Илгэлээх олох тэнийэр,
Ийэ баар буолан —
Иллээх кэргэн иитиллэр
Алтынньы 24 күнүгэр Саха сиригэр Ийэ күнүгэр аналлаах «Ийэ баар буолан -илгэлээх олох тэнийэр» быыстапка-дьаарбаӊка модельнай бибилэтиэкэҕэ буолан ааста. Манна дьиэ кэргэн маанылаах ийэлэрэ – дьиэ хаhаайкалара: Елена Афанасьева, Александра Стручкова, Елена Иванова, Розалия Шарипова, Зоя Яковлева, Елена Винокурова, Октябрина Сячикова, Анна Мондоева, Варвара Никифорова, Антонина Харайданова, Клавдия Мексярова уонна ону тэӊӊэ иллээх дьиэ кэргэн Павловтар, Майоровтар кыттыыны ыллылар. Быыстапка-дьаарбаӊка аhыллыытыгар «Күн күбэй ийэбэр» хоhоону Владимир Васильев уонна «Ийэбэр» ырыаны Полина Попова ийэлэргэ бэлэх ууннулар.
Бастакы «Хаhаастаах хаhаайка остуола» түһүмэххэ элбэх сылларга, бэйэбит дойдубут эмтээх отунан дьарыктанар Елена Винокурова чэйин арааhа элбэҕинэн сѳхтѳрдѳ. Кэлбит ыалдьыттары барыларын эмтээх, амтаннаах чэйинэн күндүлээтэ.
Анна Мондоева сирин аhынан — барыанньата арааhа элбэҕэ дьон биhирэбилин ылыан ылла: отон, сугун, охта, моонньоҕон, кииhилэ, дьэдьэн, черника, клубника. Елена Иванова кэргэнин дойдутуттан, Арыы-Толоонтон, үргээбит саамай күндү, минньигэс дьэдьэнин сытынан саала иhин толордо. Ону кытта фруктаттан, отоннортон ассорти желетин боруобалаабыт дьон минньигэhин сѳхтүлэр-махтайдылар.
Павловтар ийэлэрин Елена дойдутуттан, Амма оройуонуттан, олохтоох сибиэhэй мүѳтүн илдьэ кэлэн быыстапкаҕа туруоран, атыылаан бардылар. Биhиги кылгас сайыммытыгар Александра Стручкова, Розалия Шарипова, Зоя Яковлева, Октябрина Сячикова, Варвара Никифорова оҕуруот аhын олордубут, кѳрѳн-истэн бүѳбэйдээбит астарыттан араас кэнсиэрбэни бэлэмнээн аҕалбыттар. Кэнсиэрбэ — ас хаһааныы биир сүрүн көрүҥэ буолара бу да сырыыга бигэргэтилиннэ.
Майоровтар дьиэ кэргэн олордубут оҕуруоттарын аhыттан джем, барыанньа оӊорон аҕалан күндүлээтилэр. Елена Афанасьева минньигэс салаатын тэрээhиӊӊэ кэлбит киhи барыта боруобалаата. Клавдия Алексеевна уолунаан Александрдыын бэчээттээн таhаарбыт кэлэр сыл халандаарын, Томпо оройуонун путеводителин атыыга аҕалбыт. Зоя Яковлева атыыга киирбит харчытын кыраайы үѳрэтэр отделга спонсардаата. Зоя Николаевнаҕа улахан махталбытын тиэрдэбит.
Тэрээhин бастакы чааhын түмүгүнэн кэлбит хас биирдии кыттааччыга модельнай бибилэтиэкэ аатыттан махтал сурук туттарылынна.
Тэрээhиммит иккис чааhынан Ийэлэргэ аналлаах караоке ырыа буолла.
Ырыа-тойук аргыстаах
Ыллам-дьэллэм оҕолор,
Миигин кытары доҕоттор
Дорҕоонноохтук ыллаһыҥ…
Бу караоке ырыа киэhэтин бары хорунан ийэ туhунан ырыанан саҕалаатыбыт. Онтон салгыы икки Еленалар «Таптыаҕыҥ ийэни» дуэттаатылар. Ийэлэр кѳрдѳhүүлэринэн Владимир Васильев эҕэрдэлээн туран Аскалон Павлов «Ийэбэр» ырыаны толордо. Бэрт көхтөөхтүк ыллаан-туойан, бэркэ сынньанан, астынан тарҕастыбыт. Модельнай бибилэтиэкэ аатыттан кэлбит бары ыалдьыттарбытыгар барҕа махтал тылларын аныыбыт. Баҕарабыт чэгиэн доруобуйаны, үлэҕитигэр ситиhиини!
Александра Ефимова, бибилэтиэкэр
