Киэҥ ааҕааччы таптаан ааҕар айымньыларыгар олох бары үөрүүлээх да, хомолтолоох да өрүттэрин уус –ураннык чочуйан, норуоттан тахсыбыт геройдарын – саха өйүн –санаатын аныгы оҥкулун олохтообут маҥнайгы интеллигенциябыт, Аҕа дойду көмүскэлигэр тыыннарын толук ууралларын кэрэйбэккэ турууласпыт бэтэрээннэрбит, аан дойдуга тиийэ биллибит талааннаах ырыаһыттарбыт, айар дьоммут, Олимпийскай оонньуулар үрдүкү үктэллэрин дабайбыт дьүккүөрдээх тустууктарбыт, хорсун следователь, мындыр учуонай, онтон да атын идэлээх дьоммут тыыннаах уобарастарын, киһи быһыытынан ис дууһаларын итэҕэтиилээхтик арыйан, үүнэр үйэҕэ холобурунан туруорбут , дьон –норуот таптыыр суруйааччыта Егор Петрович Неймохов бу ый 30 күнүгэр 75 сылын туолар.
Бу бэлиэ күнү көрсө Үөгэн библиотекалар ааҕааччыларга анаан Егор Петрович туһунан литературнай чаас ыытылынна. Ааҕааччылар Егор Неймохов олоҕун, айар үлэтин кытта билистилэр.
Егор Неймоховка олоҕун, айар үлэтин билиһиннэрэр сыаллаах эрдэ бэриллибит викторина түмүгүн библиотекарь таһааран кыттыылаахтарга туоһу суругу кытта сэмэй бэлэх туттарылынна. Түмүккэ Семен Егорович Матаркин Егор Неймоховтыын Кириэс Халдьаайыга интернакка бииргэ олорон үөрэммиттэрин кэпсээтэ.
Биир дойдулаахпыт, саха народнай суруйааччыта, П. А. Ойуунускай аатынан, Саха комсомолун бириэмийэлэрин лауреаттара, Өрөспүүбүлүкэ культуратын үтүөлээх үлэһитэ, сахалартан бастакы киносценарист Егор Петрович Неймохов айан хаалларбыт айымньылара, оҥорбут үлэлэрэ куруук ааҕылла, кэрэхсэнэ турдун!