Арассыыйаҕа уһуннук салҕаммыт 12 хонуктаах Саҥа дьыллааҕы бырааһынньык кэнниттэн, өрөбүллэрбит бүтэн, үлэ-үөрэх быыһыгар сырыттахпытына, Эргэ Саҥа Дьылбыт кэлэн, бырааһынньыктааҕы настарыанньаны көбүтэн аҕалла. Бу күн, тохсунньу 14 күнүгэр, Эргэ Саҥа Дьылы кѳрсѳ модельнай бибилэтиэкэ аактабай саалатыгар муһуннубут. Саргылаах Саӊа Дьылынан эҕэрдэлээн тураммыт Эргэ Сана дьыллааҕы тэрээhиммитин флешмоб үӊкүүнэн саҕалаатыбыт. Yӊкүүбүтүгэр Тымныы Моруос оҕонньор уонна кини сиэнэ кыыс Хаарчаана кыттыhан тэрээhиммит кѳхтѳѳхтүк барыыта, дьон-сэргэ бары кэтэһэр, үчүгэйи эрэннэрэр бырааhынньыга буолара саарбаҕа суох буолла. Тымныы Моруос оҕонньору, кини сиэнэ кыыс Хаарчаананы куйаар куодунан аhыллар уонна ону тэӊӊэ хас биирдии кэлбит ыалдьыппытын билгэлээх минньигэс бэлэҕинэн күндүлээтибит.
Арасыыйаҕа тохсунньу 14 күнүгэр Эргэ Саҥа Дьылы тоҕо бырааһынньыктыылларын, саха халандаарынан кэлбит 2026 сыл — Yрүӊ Айыы Тойон сылын, таайтарыылаах Таӊха туhунан кылгас устуоруйаларын билистибит. Таҥха туһунан тугу билэрбитин тургутан көрдүбүт, сѳптѳѳх эппиэти биэрбиттэргэ тута кыра сэмэй бэлэх туттартаатыбыт. Ол кэнниттэн сахалыы остуол, Таӊха оонньууларын оонньоотубут, күрэхтэстибит. Оонньуу түмүгүнэн бастакы хамаанда кыайыылааҕынан буолла уонна бирииhинэн наҕараадаланна. Оонньуу ыытааччынан уонна судьуйатынан сахалыы остуол оонньуутун баhылаабыт Зоя Николаевна Яковлева буолла. Зоя Николаевна ѳссѳ туспа остуол оонньуутун ыытыахха сѳп этэ диэн этии киллэрдэ, ону оонньуу кыттыылаахтара бары бэркэ сэргии иhиттилэр.
Тэрээhиммитигэр кыттыбыт ааҕаачыларбытыгар барҕа махтал тылларын аныыбыт уонна Үрүҥ Айыы Тойон салайар үүммүт 2026 сылыгар бука бары чокуур таас курдук кытаанах, чиргэл туруктаныҥ, дьиэҕит сылаас, сандалыгыт толору астаах, өйгүт-санааҕыт ыраас, тирэхтээх буоллун, оҕолоргут-сиэннэргит дьоллоох-соргулаах буоллуннар!
Бибилэтиэкэр Александра Ефимова