Хомус күнэ, ахсынньы 13 күнүгэр модельнай бибилэтиэкэ аактабай саалатыгар буолла.
СӨ култууратын үтүөлээх үлэһитэ уонна үөрэҕириитин туйгуна, «Бэйбэрэ» уонна “Дэгэрэҥ” хомусчуттар ансаамбылларын салайааччыта Лидия Михайловна Борисова «Хомус тардыытын, сайдыытын кэрчик кэмнэрэ» диэн бэрт интэриэһинэй билиһиннэриини оҥорон дьон болҕомтотун тарта. Биэчэрбит ыалдьыттарынан Лука Турнин стипендиятын ылар иһин куонкурус кыттыылаахтара Вероника Захарова уонна Александра Захарова буоллулар. Куонкуруска Лидия Михайловна сүбэтинэн кыттан, астынан кэлбиттэрин бэлиэтээн туран наставниктарыгар улахан махталларын биллэрдилэр уонна хомус күнүнэн бэйэлэрин сэмэй бэлэхтэрин туттардылар. Куонкурс 2025 сыл стипендиатын аатын «Дэгэрэҥ» хомусчуттар ансаамбылларын солистката, Хаандыгатааҕы искусство оскуолатын фольклор кылааһын преподавателэ Вероника Семеновна Захарова ылан, кыайан-хотон кэлбит үөрүүтүн үлэһиннэ. Куонкурус кыттыылаахтарын Оройуоннааҕы култуура сайдыытын уонна норуот айымньытын киинин салайааччыта Ирина Бодруг эҕэрдэлээтэ уонна махтал сурук, сэмэй бэлэх туттартаата.
Бу киэһэ икки саҥа кинигэлэр сүрэхтэннилэр: «САХА ЯКУТИЯ* НАШ ПУТЕВОЙ ДНЕВНИК Зёрена Бирке и Марайки Бадер» уонна «Сайдам санаалаах, ыраас дууһалаах үтүө киһи — Кирииллэбис». Кинигэлэри билиһиннэрдэ РФ Суруналыыстарын сойууһун чилиэнэ Елена Кимовна Винокурова.
«Хомуспун хоһоонунан хоһуйуум» хомус туһунан хомоҕой хоһооннорун ааҕан иһитиннэрдилэр Александра Стручкова – Сулустаана уонна Клавдия Мексярова – Оросунская, ону тэҥэ Сырдык Айалхаана Баай «Дьүрүһүй, хомуһум, өбүгэм тыыннаах дорҕооно» дьүһүйүүтүн.
ХОМУС ТҮҺҮЛГЭТИН киэргэппит бары хомусчуттарга, чуолаан «Дьиэрэй», “Дьүкээбил” ансаамбылларга, бары кыттааччыларга барҕа махтал тылларын аныыбыт.
Бибилэтиэкэр Александра Ефимова