Кулун тутар 9 күнүгэр Саһыл нэһилиэгин культурнай-спортивнай киинигэр Ирина Елизарова “Ураты” кинигэтин сүрэхтэнии-ахтыы биэчэрэ буолан ааста. Ирина бэс ыйын 9 күнүгэр 1975 сыллаахха күн сирин көрбүтэ. 3 сааһыгар Томпо улууһун Саһыл нэһилиэгин төрүт олохтоохторо Анна Прокопьевна уонна Николай Гаврильевич иккис оҕонон бэйэлэрин анныларынан суруйтаран иитэ ылбыттара. Ирина Елизарова 1982 сыллаахха оскуолаҕа киирбитэ, кыра кылаастан сөбүлээн ыллыыра, музыкальнай оскуолаҕа Ольга Степановна Охлопковаҕа үөрэммитэ, кэлин улаатан баран бэйэтин баҕатынан гитараҕа үөрэнэн бэрткэ оонньуур буолбута. 1992 сыллаахха оскуолатын бүтэрэн, колледж культуры и искусств үөрэнэ киирбитэ. 2000 сыллаахаа атырдьах ыйын 2 күнүгэр сирдээҕи аналын толорон, уол оҕоҕо күн сирин көрдөрбүтэ.
Ирина Елизарова «УРАТЫ» диэн ааттаах кинигэни кэпсиир буоллахха, 2023 сыл сэтинньи 7 күнүгэр Галина Васильевна Нельбисова хомуйан оҥорбута, төрөппүт уола Рудольф, дьүөгэтэ Марианна Наумова көҕүллээһиннэринэн тахсыбыта. Ол курдук кинигэ 2000 экземплярдаах, 171 сирэйдээх, Саха сиринээҕи С.А. Новгородов аатынан «Айар» национальнай издательскай компанияҕа бэчээттэммитэ. Кинигэҕэ чугас дьоно, аймахтара доҕотторо, бииргэ үлэлээбит коллегалара ахтыылара суруллубут. Кинигэ саха тылынан суруллан ааҕааччы киэҥ эйгэтигэр ананна. Кинигэ уратыта диэн аныгылыы куйаар куодунан киирэн ырыаларын истиэххитин сөп.
Кинигэ презентациятыгар биэчэргэ кэлбит ыалдьыттар бэйэлэрин санааларын, эҕэрдэлэрин, сылаас тылларын анаатылар: Саһыл нэһилиэгин баһылыга Степан Яковлев, “Кыым” хаһыат корреспондена Саргылана Багынанова, чугас доҕоро Марианна Наумова, ырыаҕа чочуйбут учуутала Ольга Охлопкова-Чөмчүүнэ, Е.Е. Протопопов аатынан Саһыллааҕы орто оскуола аатыттан Сардаана Сидорова, КСЦ директора Федор Охлопков, Ирина учуутала Айалхаана Баай, бииргэ үөрэммит доҕоро Мария Стручкова, Ирина Варламова, аймахтартан Галина Елизарова уонна Ирина уола Рудольф. Рудольф биэчэргэ ийэтин ырыатын ыллаан дьон сүрэҕин таарыйда.
Кинигэ сүрэхтэниитин иилээн саҕалаан ыытта Юрий Аянитов, аппаратураҕа үлэлээтэ Владимир Васильев. Биэчэр Ирина оҕо сааһыттан саҕаллаан фото презентациянан ааста. Хас биирдии этиллибит сылаас тыллара, уолугар Рудольфка баҕа санаалара, ыллаабыт ырыалара биэчэри олус киэргэттэ. Махтал кинигэ сүрэхтэниитигэр кэлбит ыалдьыттарбытыгар. Куруук доруобай буолун, үөрэ-көтө сылдьын!
Айталина Елизарова, Саһыл нэһилиэгин олохтоох библиотека главнай библиотекара.